అమ్మా, నాన్నలా? మమ్మీ, డాడీలా?

రెండింటికి ఉన్న తేడా ఏంటి? ఎందుకు లేదు? తెలుగోళ్ళకు, తెల్లోళ్ళకు ఉన్నంత తేడా ఉంది. మీ కంప్యూటర్ కు తెలుగొచ్చా? అని బ్యానర్ పెట్టినట్టు మీ పిల్లలకు అమ్మ, నాన్నఅని పిలవడం వచ్చా? అని కూడా పెట్టాలేమో!!

మన రాష్ర్టంలో ఉన్నంతవరకూ మన భాష గుర్తురాదు. విదేశాలు వెళ్ళగానే అక్కడ తెలుగు పండుగలు జరపడం.. (అంటే ఇక్కడ కన్నా ఎక్కువ సంప్రదాయాలు పాటించడం వంటివి) తెలుగు భాష నేర్చుకోవడం... నేర్పించడం వంటి ‘పిచ్చి’ అభిమానం ఎందుకు పుట్టుకొస్తుందో!! అదే ప్రజలు ఇక్కడకొస్తే అక్కడి వయ్యారాల ఇంగిలిపీసు వలకబోసేస్తారు. ప్రజలంతా ఇపుడు యుద్దప్రాతిపదికన తెలుగు భాషను పరిరక్షించేస్తున్నారు... ముందు ఇలాంటి (మమ్మి, డాడీ, ఆంటి, అంకుల్) పిలుపుల్లో మన ఇంట్లో నుంచి మార్పు తేగలిగితే మిగిలినది దానంతట అదే సరిఅవుతుంది.

పక్కంటివాళ్ళను, ఎవరైనా కొత్తవాళ్ళను ఆంటి, అంకుల్ అని పిలవడం వరకూ బాగుంది, ఎందుకంటే వారిని ఏ వరస ప్రకారం పిలవాలో తెలియదు కాబట్టి. కానీ, మన బంధువుల్లో ఉన్నవాళ్ళు... వాళ్ళు ఏ వరసవుతారో తెలిసినా, వాళ్ళను కూడా ఆంటి, అంకుల్ అని పిలవడం.. ఎంతవరకూ బాగుంటుంది? మా బంధువుల్లో ఒకరు పెద్దనాన్న, పెద్దమ్మలను Big Daddy, Big Mom అని పిలుస్తారు... మరీ బడాయి .

మాకు తెలిసిన ఓ పెద్దాయన మనుమరాలు అమెరికా నుంచి వచ్చింది... 4 ఏళ్ళు ఉంటాయి. చక్కటి తెలుగు మాట్లాడుతుంది... మా అందరి ముందు బడాయి కోసం.... ఆ అమ్మాయి తెలుగు మాట్లాడినపుడల్లా ఆ పెద్దాయన ఇంగ్లీషులో మాట్లాడు, ఇంగ్లీషులో మాట్లాడు అని అంటున్నాడు. ఇలాంటి పిల్లలు అమెరికాలో తెలుగు నేర్చుకోవడం ఓ పెద్ద గొప్ప, ప్రపంచ వింత... అదే తెలుగు ఇక్కడ మాట్లాడితే మాట్లాడనివ్వరు.

ఇక అంకుల్ గురించి మా సోషియాలజీ మాష్టారు చెప్పిన ఓ సంగతి గుర్తుకొస్తుంది...
ఓ 18 ఏళ్ళ అమ్మాయి పక్కింట్లో ఉండే ఓ 40 ఏళ్ళతన్ని అంకుల్ అని పిలిచిందంట!! అపుడు ఆ ఇంటి మీద పెంకులు గాడు పళ్ళు ఇకిలిస్తు... అంకుల్ కి చిన్నాన్న, మామయ్య అనే రెండర్ధాలు ఉన్నాయి.. నువ్వు ఏ అర్ధంతో పిలిచావో చెపితే నీతో నా ‘ప్రవర్తన’ ఆ విధంగా ఉంటుంది అన్నాడట. ఇక ఆంటీ అంటే కొన్ని సినిమాల్లో విన్న ద్వంద్వార్ధాల వల్ల ఆంటీ అనే మాటే పెద్ద బూతులా వినిపిస్తుంది + ఒకసారి బస్టాపులో నిలబడినపుడు కొందరి పోకిరీ వెధవల మాటలవల్ల కూడా అది నిర్ధారణ అయింది (ఇక్కడ రాయలేనిది).

నాకు తెలిసిన స్నేహితుల్లో కొందరు అమ్మ, నాన్న అనే పిలిపించుకుంటారు... ఏంటి అని అడిగితే... ఈజిప్టు మమ్మీలు, కరీమ్ బీడీలు మనకెందుకమ్మా!! అమ్మ, నాన్న అంటేనే బాగుంది అంటారు. మా ఇంట్లో కూడా అమ్మ, నాన్న అనే పిలుస్తాము... రేపు మా పిల్లలు కూడా అంతే!!

మీరంతా అమ్మ, నాన్న అని పిలిచి దయచేసి మీ పిల్లల చేత మమ్మి, డాడీ అని పిలిపించుకోకండి. తెలుగు భాషకు ఓ పెద్ద గొప్ప సేవ చెయ్యలేకపోయినా... ఇలాంటివి మార్చగలం కదా!!! .